Ашыгыч медицина ярдәме буенча баш белгеч ашыгыч ярдәм хезмәте түләүле булмый, дип хәбәр итте

2018 елдан ашыгыч ярдәм чакырту түләүле була дигән мәгълүмат дөреслеккә туры килми. Бу хакта Татарстанда Ашыгыч медицина ярдәме буенча баш белгеч Галина Воронцова "Татар-информ" агентылыгында узган матбугат конференциясендә белдерде.

Ашыгыч ярдәм хезмәте чакырту өчен түләргә туры киләчәк дигән мәгълүмат инде узган елдан бирле социаль челтәрләр аша таратыла. "Бүгенге көндә ел әйләнәсендә бер кешегә ашыгыч ярдәм чакырту санын регламентлаучы бернинди документ юк. Әлеге документның чыгу ихтималы турында әлегә төгәл әйтеп тә булмый, - дип белдерде Галина Воронцова.

Ул шул ук вакытта республикада шәхси медицина ярдәме күрсәтүчеләр дә барлыгын билгеләп үтте. Пациент ярдәмгә кайсын чакыртуны үзе сайлый.

Татар-информ