Яшь картингчылар бүләкләнде

6 март көнне муниципаль район Советының утырышлар залында узган “Эшлекле шимбә” киңәшмәсендә, Балтачта, Ватанны саклаучылар көне уңаеннан яшүсмерләр арасында үткәрелгән районара картингчылар ярышында призлы урыннарны яулаган бертөркем яшь картингчыларыбызны бүләкләү тантанасы булып үтте.

 Әлеге ярышта “Хонда – 270” классында чыгыш ясаган Тимур Шәйдуллин (беренче урын), “Хонда – 200” классында ярышкан Сәет Заһидуллин (беренче урын),”Стриж” классында көч сынашкан Кирилл Толмачев (өченче урын) һәм ярышта катнашкан Инсаф Галиуллин белән Данис Сәхәбиев Мактау грамоталары һәм медальләр белән бүләкләнделәр. Картинг клубы механигы Илшат Шәрәфиевка Рәхмәт хаты тапшырылды. Исегезгә төшерәбез: картинг клубы узган ел ДОСААФ оешмасы каршында оешты һәм уңышлы эшләп килә. Хәзер картинг клубына 70 кә якын яшүсмер йөри.

Бүләкләрне ияләренә муниципаль район башлыгы Нәҗип Хаҗипов белән муниципаль район башкарма комитеты җитәкчесе Илнур Хәмидуллин тапшырды.

Фәнил Гаязов фотолары.