Сабантуйга

Сабантуйга  әзерләнә  халкым

Бар  эшләрен  куя  тәртипләп.

Кабарыплар  пешкән  йомшак  җиргә

Орлыкларын  чәчте  бөртекләп.

Сабан  туе  борынгыдан  килгән

Икмәк  белән  гомер  ителгән.

Тубал  асып  орлык  чәчкән  еллар

Китапларга  гына  күчелгән.

Тырыш  гаилә, матур  күрсәткечләр

Сокландыра  бүген  һәркемне.

Таркалмый  да, бердәм  булып  яши

 Сабантуй  күк  аның  һәр  көне.

Сабантуе  дөнья  иңли  бүген

Миллилекнең  матур  үрнәге.

Мәйдан  уртасында   көрәш  бара

Урап  алган  халык - бизәге.

Атлар  килә, аргамаклар  килә...

Ташкын  кебек  халык  тын  кала.

Илләр  генә  түгел, малкайлар  да

Бәйгеләрдә  шулай  сынала.

Сабантуйда,  мәйданнарны  иңләп

Чыгар  әле  безнең  ир - атлар.

Данга  күмеп, бүләкләнер  әле

Җиңү  яулап  кайткан  солдатлар.

Зәңгәр  күктә  күгәрченнәр  оча

Тынычлыкка  чакыру  билгесе.

Татулыкка, бердәмлеккә  дәшә

Җилфердәгән  татар  сөлгесе!

  Минҗиһан.Теләче