Хәтерләсәгез, Укытучылар көне уңаеннан бәйге игълан иткән идек. Бүген сезгә Үзәк урта мәктәбенең 8 нче сыйныф укучысы Шиһабиева Адиләнең үзе язган шигырен тәкъдим итәбез.
Хәтеремдә: курка-курка гына
Сыйныфыма килеп кергәнем.
Хәтеремдә: шулчак тәүге тапкыр
Якты йөзен аның күргәнем.
Хәтеремдә: әниемдәй килеп,
Иңнәремнән кочып сөйгәне.
Әллә ничек югалып, каушап калгач,
Яшьләремне минем сөрткәне.
Хәтеремдә: сабый күңелемә
Ап-ак нурлар алып сипкәне.
Кызганмыйча безгә бөтен көчен
Күпме фәннән гыйлем биргәне.
Хәтеремдә: ялгыш абынганда,
Төпле киңәшләрен биргәне.
“Балаларым!”- диеп, көне-төне
Безнең өчен янып-көйгәне.
Нет комментариев