Укытучы булу теләге миндә болай гына тумады — бу һөнәр безнең гаиләдә электән үк яшәп килде. Минем төп ориентирым - әнием, Гарифуллина Рузилә Саетшовна: ул Иске Җөри мәктәбендә инде 40 елга якын балаларга белем һәм тәрбия бирә. Мин балачактан ук аның үз эшенә күпме көч, түземлек һәм чын мәхәббәт салганын күрдем.
Минем өчен аның укыту стажы - сан гына түгел, ә тулы бер тарих: тикшерелгән дәфтәрләр өеме, ачык дәресләр алдыннан дулкынлану, укучыларның җиңүләренә шатлану һәм һәр бала аңлаганчы тыныч кына аңлата белү. Аңа карап, мин сәләт белән тырышлык нинди зур көчкә ия булганын күрдем. Минем дә шундый буласым килде.
Профессиягә юлым мавыктыргыч иде: мин Казан Федераль Университетын тәмамладым, анда үземне кызыксындырган фәннәрне — математика белән инглиз телен берләштерә алдым. Математика һәрвакыт үзенең төгәллеге белән ошый иде. Инглиз теле башка мәдәниятләргә ишек ача, кешеләр белән уртак тел табарга ярдәм итә. Минем бу дөньяларны аермыйча, укучыларга логика һәм иҗатның кулга-кул тотынышып бара алуын күрсәтәсем килде. Өстәвенә мәктәбебезнең математика укытучысы Фирдәүсә Хөснулловна, инглиз теле укытучысы Зиннур Зөфәрович заманында үз фәннәренә мәхәббәт уяттылар. Минем математика һәм инглиз профилем шулай формалашты.
Шулай итеп, минем укытучы ролендә беренче тапкыр мәктәпкә килү елы җитте. Бер ел - зур булмаган вакыт, ләкин ул вакыйгаларга бай иде. Өметләрем, әлбәттә, булды: мин балаларны ничек рухландырачагымны, аларның кечкенә җиңүләренә — дөрес хәл ителгән мәсьәләгә яки инглизчә төзелгән беренче җөмләләренә, ничек бергәләп шатланачагыбызны күз алдыма китерә идем. Чынбарлык бераз бүтәнрәк булып чыкты. Һәр дәрес артында зур әзерлек эше тора икән: фәнне белү генә түгел, ә аны һәркемгә аңлаешлы һәм кызыклы итеп бирә белү кирәк. Мин күп нәрсәгә өйрәндем: сабырлыкка, сыгылмалылыкка, дәрестә төрле ситуацияләргә әзер булып торырга. Кайвакыт мин бик җентекләп уйлаган планны дәреснең икенче минутында ук үзгәртергә туры килде, чөнки сыйныф бүген аеруча шау-шулы, яки тема мин көткәнчә аңлашылмады. Ләкин боларның һәммәсе дә нәкъ мине укытучы итеп формалаштыруга ярдәм итә.
Хәзер мин юлның башында гына, алда әле күп нәрсәне белергә һәм үзләштерергә кирәк. Ләкин мин тәгаен беләм: мин үз урынымда. Минем алда озын, шул ук вакытта бик мөһим юл — һәм мин ул юл буенча барырга әзер.
Сөмбел Гарифуллина, Иске Җөри урта мәктәбенең математика укытучысы.
Нет комментариев