«Бердәм Россия» Дәүләт Советына депутатлыкка кандидатлар исемлеген тәкъдим итте

 Татарстанның «Бердәм Россия» партиясе төбәкнең Үзәк сайлау комиссиясенә VI чакырылыш Татарстан Дәүләт Советына депутатлыкка кандидатларның республика исемлеген тәкъдим итте.

«Бердәм Россия» фракциясе җитәкчесе Юрий Камалтынов хәбәр иткәнчә, партия исемлегенә 2019 елның 26 маенда партиянең алдан тавыш бирү вакытында татарстанлылар үзләре сайлаган 56 фамилия кергән. «Бердәм Россия» партиясеннән кандидатлар өчен республикада яшәүче 400 меңгә якын кеше тавыш бирде.

«Без Татарстан Үзәк сайлау комиссиясенә документлар бирдек, өч көн эчендә алар каралачак дип ышандырдылар. Җомга көнне республика Үзәк сайлау комиссиясе утырышы булыр дип өметләнәбез. Без моңа бик өметләнәбез, чөнки документларны бик җентекләп әзерләдек», – диде Юрий Камалтынов.

Татарстан Үзәк сайлау комиссиясе матбугат хезмәте җитәкчесе Әлфия Алимова исемлекне теркәү турындагы карар 24 июльгә кадәр кабул ителәчәк дип аңлатты. Исемлекне раслаганнан һәм «Бердәм Россия» партиясе Татарстан төбәк бүлегенең махсус сайлау счеты ачылганнан соң теркәү процедурасы узачак. Әмма бүгенге көннән үк бердәмроссиялеләр агитация эше алып бара алалар.

Татарстанның «Бердәм Россия» партиясе 20 июньдә партия конференциясендә ТР Дәүләт Советына депутатлыкка кандидатлар исемлеген раслады. Исемлектә беренче урынны Татарстан парламенты башлыгы Фәрит Мөхәммәтшин, «КАМАЗ-Мастер» автоузыш командасы җитәкчесе Владимир Чагин һәм «Бала-сити» балалар үзәкләре челтәре директоры Альбина Насыйрова алды.

Хакимият партиясеннән кандидатлар арасында шулай ук ТР авыл хуҗалыгы һәм азык-төлек министры Марат Әхмәтов, ТНВ генераль директоры Илшат Әминов, ТР Дәүләт Советы Секретаре Лилия Маврина, Яшел Үзән районы башлыгы Александр Тыгин һәм башкалар бар иде.

Фото: Рамиль Гали

 Бу хакта тулырак: https://tatar-inform.tatar/news/2019/06/26/188795/