Бала өчен «Путин түләүләрен» ничек алырга: мохтаҗлыкны исәпләү формуласы

Бу юлы 8 яшьтән алып 17 яшькә кадәрге балалар тәрбияләүче гаиләләр өчен. Ай саен түләнә торган акчалата ярдәм кемнәргә бирелми? Пособиенең күләме нинди? Документларны кайда тапшырырга? «Интертат» пособиене билгеләү өчен мохтаҗлыкны исәпләү формуласын тәкъдим итә.

Россиядә аз керемле гаиләләр өчен яңа төрле ярдәм чарасы кертелә. 8 яшьтән алып 17 яшькә кадәрге балалар тәрбияләүче гаиләләр өчен пособиегә 1 майдан документлар тапшырырга мөмкин. Октябрьгә кадәр гариза язарга була. 5-10 мең тирәсе акчалата ярдәм апрель аен да кертеп исәпләнәчәк. Россия Хезмәт һәм социаль яклау министрлыгы гаризаларны алданрак та – апрель аенда ук тапшырырга мөмкин булуы турында белдергән иде. Моның өчен Дәүләт хезмәтләре порталын кулланырга була. Татарстанда май бәйрәмнәрендә документларны кабул итү өчен махсус эш сәгатьләре булдырыла.

Гаризаны 10 эш көне дәвамында караячаклар. Аерым очракларда ул озайтылырга да мөмкин. Әгәр гаризаны карау вакыты озайтылса, гаиләгә бу турыда хәбәр ителәчәк.

Мохтаҗлыкны исәпләү формуласы

8 яшьтән 17 яшькә кадәрге балалар өчен «Путин түләүләре»нең күләме гаиләнең бер айга күпме керем алып яшәвенә бәйле. Россия Пенсия фондының Татарстан Республикасы буенча бүлеге идарәчесе Эдуард Вафин пособиене исәпләү формуласын аңлатты.

«Республикада бала өчен яшәү минимумының күләме –  10 433 сум. Айлык түләүнең база күләме Татарстанда балалар өчен яшәү минимумы күләменең 50 процентын – 5 216 сумны тәшкил итә. Бала өчен яшәү минимумының 50 проценты күләмендәге ай саен бирелә торган түләү билгеләнгән вакытта, гаиләдә җан башына туры килгән керем күләме уртача яшәү минимумыннан кимрәк булса, ай саен түләнә торган акча яшәү минимумының 75 проценты күләмендә – 7 824 сум итеп билгеләнә», – диде ул.

Яшәү минимумы күләменең 75 проценты хәтле айлык түләү билгеләнгән вакытта, гаиләдә җан башына туры килгән уртача керем республика күләмендә җан башына исәпләнгән яшәү минимумыннан кимрәк булса, түләү күләме 10 433 сумны тәшкил итәчәк. Ягъни, бу очракта бала өчен яшәү минимумы күләменең 100 проценты түләнә. Түләү билгеләнгән вакытта шулай ук милекне бәяләү дә исәпкә алына.

8 яшьтән 17 яшькә кадәрге балалар өчен түләүләр аларның мохтаҗлыгын комплекслы бәяләү нәтиҗәләреннән чыгып билгеләнәчәк. Гаиләнең керемнәре, мөлкәте, ата-ананың хезмәт хакы яки, объектив сәбәпләр аркасында, керемнәренең булуы яки булмавы исәпкә алыначак.

Пенсия, стипендия, фатир, йорт, машина исәпкә алына

Пособие гаиләнең өлкән яшьтәге әгъзаларының хезмәт хакы, стипендиясе, эшмәкәрлектән кергән кереме, пенсиясе яки кереме булмаганнарны исәпләп билгеләнә. «Нульле керем» кагыйдәсе ата-ана 2022 елның 1 мартыннан соң эшен югалткан һәм мәшгульлек үзәгендә исәпкә баскан очракта гамәлдә. Бу очракта аның элеккеге хезмәт керемнәре гаиләдә җан башына туры килгән уртача керемне санаганда исәпкә алынмаячак.

«Мондый кагыйдәне кулланганда түләү алты айга билгеләнә. Бу чордан соң пособие сорап кабат мөрәҗәгать итәргә мөмкин булачак. Мондый алым 2022 ел ахырына кадәр гамәлдә булачак», –  дип ассызыклады Вафин.

Ихтыяҗны бәяләгәндә берничә күчемле һәм күчемсез милек объектлары –  фатирлар, йортлар, машиналар булу исәпкә алыначак. Әйтик, гаиләнең һәр әгъзасына туры килгән гомуми мәйданы 24 квадрат метрдан артып китә торган ике һәм аннан да күбрәк фатиры булганнарга яңа төрле түләүләр бирелмәячәк.

Май ялларында документлар кабул ителә

Пособие 1 апрельдән исәпләнәчәк. Түләүне майда билгеләгән очракта ул апрель өчен дә килә. Гаризаны соңрак та бирергә мөмкин. Документлар агымдагы елның 1 октябренә кадәр бирелсә, түләүләр 1 апрельдән башлап бөтен айларга (әгәр балага апрельдә 8 яшь тулса) түләнә.

Май бәйрәмнәрендә Татарстанда күп фунцияле үзәкләр балалар өчен яңа түләүләргә гаризалар кабул итәчәк. Аларның офислары 1 майдан 10 майга кадәр ял көннәрсез эшләячәк.

«Әгәр ата-аналар дәүләт хезмәтләре порталы аша гариза бирә алмаса, күп функцияле үзәккә мөрәҗәгать итә ала. Казанда май бәйрәмнәрендә шәһәрнең төрле почмакларында өч филиал эшләячәк. Шулай ук Чаллы, Түбән Камада һәм башка шәһәрләрдә филиаллар ачык булачак», – диде Татарстан Республикасының Күп функцияле үзәк дәүләт бюджет учреждениесе директоры Ленара Мозаффарова.

Бәйрәм көннәрендә «Минем документлар» офисларының эш режимы үзгәрә. 1, 2, 3, 7, 8, 9 һәм 10 май көннәрендә офислар 10.00 – 14.00 сәгатьләрдә кизү тору режимында эшләячәк. Бу көннәрдә кабул итү бары тик 8-16 яшьлек балалар өчен түләү буенча гына алып барылачак. Ә 4, 5, 6 майда күп фунцияле үзәкләрнең офислары гадәти режимда эшли.

Мозаффарова билгеләп үткәнчә, апрельнең соңгы эш көнендә 8 яшьтән алып 17 яшькә кадәрге балалар өчен яңа түләүләргә гаризалар кабул ителмәячәк. Документларны май башыннан гына тапшырырга мөмкин. Спикер Татарстанда яшәүчеләргә дәүләт хезмәтләре порталыннан файдаланырга тәкъдим итте.

1 майдан гаризаны онлайн, Россия Пенсия фондының һәм күпфункцияле үзәкләрдә клиентлар хезмәтләрендә дә тапшырырга була.

Баласын ялгыз тәрбияләүчеләргә «икеләтә» түләү юк

Яңа төрле түләүләрләр һәр балага бер елга билгеләнә һәм гариза белән озайтыла. Россия Пенсия фондының Татарстан буенча бүлеге идарәчесе Эдуард Вафин сүзләренчә, республикада бүгенге көндә 79 меңнән артык баланың гаиләсе яңа түләү алуга дәгъва итә ала.

Айлык түләү алу хокукына ата-аналарның берсе яки баланың законлы вәкиле ия. Аларның Россия гражданины булуы һәм ил территориясендә яшәве шарт.

Моннан тыш, бу түләүләргә 8 яшьтән 17 яшькәчә берничә бала тәрбияләүче мохтаҗ гаиләләр дә дәгъва итә ала.

«Икеләтә түләү булмаячак. Ялгыз ата-аналарга билгеләнгән 8 яшьтән 18 яшькә кадәрге бала өчен айлык пособие яки яңа түләү түләнә. Түләүне алучыга отышлырагы, күбрәк күләмлесе билгеләнәчәк», –  диде Вафин.

Россия Пенсия фондының Татарстан буенча бүлегенең 8 апрельгә булган мәгълүматларына караганда, балаларын ялгыз тәрбияләүче ата-аналарга 1,3 миллиард сум акча җибәрелгән инде.

Чыганак: https://intertat.tatar/news/putin-tulaulare-8-yastan-zurrak-balalar-ocen-ai-saen-birela-yaki-moxtalyk-formulasy-5852801

Фото: