Татарстан синоптиклары: Казан халкы кышның иң салкын төнен уздырды

Казанда узган төндә 2017-2018 еллардагы кышның иң салкын төне булды. Казанның Авиатөзелеш районында төнлә термометр баганасы 29,4 градус салкынны күрсәтте. Бу хакта "Татар-информ"га Татарстан Гидрометеорология һәм әйләнә-тирә мохитне күзәтү идарәсендә сөйләделәр.

"2011 елда бу төндә тагын да салкынрак булган. "Казан-Лачын" метеостанция мәгълүматлары буенча, ул чакта Авиатөзелеш районында температура 31,7 градуска кадәр төшкән булган. Казан буенча әлеге көнгә абсолют рекорд 33,8 градус салкын. Мондый температура шәһәрдә 1898 елда күзәтелгән", - дип сөйләде Гидрометеорология һәм әйләнә-тирә мохитне күзәтү идарәсенең метеофаразлау бүлеге җитәкчесе Ирина Трущина.

23 февральдән республикада салкын һава торышы күзәтелә. Төнге сәгатьләрдә 20 - 25 градус салкын, аязганда аерым районнарда 30 градуска кадәр салкын була. Көндезен -10, -17 градустан артмый, уртача тәүлеклек температура нормадан 5 - 10 градуска түбән.

Февраль ахырында тагын да салкынрак һава торышы соңгы тапкыр Татарстанда 2011 елда күзәтелгән. Ул чакта төнлә 25 - 30 градус салкын булган, урыны белән -38 градуска кадәр төшкән.

Реклама

"Алдагы тәүлектә һава торышы үзгәрәчәк. Көньяктан кергән циклон хәлне үзгәртә. 27 февральдә республикада буран һәм кар явачак. Татарстанның көньягында кар көчле булачак. Температура төнге сәгатьләрдә 12 - 17 градуска кадәр салкын, аязганда 24 градус салкын булачак. 27 февральдә максималь температура көндез -10 нан -15 градуска кадәр, көнбатышта -18 градуска кадәр булачак", - диделәр Гидрометеорология һәм әйләнә-тирә мохитне күзәтү идарәсендә.

28 февральдә һәм 1 мартта республикада алмашынучан болытлы һава торышы көтелә, явым-төшемсез булачак. Җил төньяк-көнбатыштан, төньяктан уртача тизлектә. Һава температурасы төнлә 22 - 27 градус салкын, аязганда -31 градус булыр дип фаразлана. 28 февральдә көндез температура 12 - 17 градуска кадәр күтәрелә, 1 мартта көндез -9, - 14 градус булачак.

2 марттан Татарстанда температура күтәрелә барачак, уртача салкын һава торышы күзәтеләчәк.