Кыярны нигә «сукырайтырга»?

– «Сукырайту» – чәчәк атканчы, бөреләрне яфрак куеныннан өзеп ташлау дигән сүз. Теплицада партенокарпик (серкәләндерү таләп ителми) сортлы кыяр үстергәндә, бу ысулны куллану аеруча кирәк. Гадәттә мондый кыяр иң аскы яфрагыннан бөреләнә башлый. Гадәттә түбәнге 4–6 яфрак куенындагы бөреләрне өзеп ташлау киңәш ителә. Гәрчә бу ысул кыяр бирүне тоткарласа да, соңыннан уңышын арттыруга китерә. Ник дигәндә, үсентегә башта тамыр-яфракларының әйбәтләп үсүе-ныгуына мөмкинлек бирә. Ә бу аның алга таба үсүе өчен бик кирәк. Кыярны өскә бәйләп үстергәндә «сукырайту» аеруча кирәк. Түбәнге өлешенең төп сабагында ян бәбәкләре булмау түбәнге яфракларының яхшырак җилләнүенә, яктылыкның күбрәк төшүенә китерә. Нәтиҗәдә алар тиз саргаймый, кыярны күбрәк бирә. Бу ысул кәлшә чорында начаррак үскәннәренә аеруча файдалы. Башкаларны куып җитсен өчен боларын хәтта 1–2 бөрегә күбрәк «сукырайту» киңәш ителә. Ә инде кыярны тизрәк ашый башлау өчен, берничә үсентенең 1–2 бөресен генә өзеп алырга мөмкин.

Чыганак: https://vatantat.ru/2025/06/171827/
© Ватаным Татарстан