Үзәк чыршы ачу тамашасына рәхим итегез!

Районыбыз җитештерүчеләре биредә ашлык, ит, сөт, сыр, бал һәм сыер маеннан тыш, Яңа ел өстәленә куела торган каз-үрдәк, тавык түшкәләре, какланган казылык, бакча нигъмәтләре, алардан ясалган төрле кайнатмалар һәм тозлыклар белән дә сәүдә итәчәкләр. Моннан тыш, ярминкәгә килүчеләрне тәмле коймак һәм кайнар чәй белән дә сыйлаячаклар.

Ә 15.00 сәгатьтән янәшәдә урнашкан Теләче үзәк ял паркында җырлы-биюле, уен-көлкеле Үзәк чыршыны ачу тамашасы башланачак. Биредә Кыш бабайлар белән Кар кызлары парады да узачак. Әлеге күңелле тамашада күңелләребезгә сихрилек, яктылык өстәп, 16.00 сәгатьтә бәйрәм салюты да аттырылачак. Хөрмәтле райондашлар, районыбыз кунаклары! Сезне ярминкәле, мул сыйлы һәм күңелле Үзәк чыршыны ачу тамашасына чакырып калабыз. Саклану чаралары күрү сорала.