Теләчедән 20 егет тиздән солдат булачак

Агымдагы елның 1 октябреннән 31 декабренә кадәр хәрби хезмәткә чакырылыш кампаниясе бара. ТР Хәрби комиссариатының Саба һәм Теләче районнары буенча бүлегеннән алынган мәгълүматларга карасак, Теләче районы буенча 140 ир-ат медицина комиссиясенә чакырылган, бу 140 кеше хәрби бурыч үтәү яшендә дигән сүз. Алар арасыннан 20 кеше быелгы хәрби чакырылыш кампаниясендә Ватан алдындагы бурычларын үтәргә җибәреләчәк. Хәзерге вакытта Теләче районыннан 41 егет хезмәт итә. Аларга хәрби хезмәтләрен үтәп, исән-имин туган якларга әйләнеп кайтуларын телибез.