Кафеда аш уздырырга ярыймы?

— Коръән мәҗлесен, ифтар ашларын кафеда уздырырга рөхсәт ителә. Мәчет территориясендәге туклану урыннарында да үткәрергә була. Кайберәүләр, кунаклар йортка сыймаганда, кафены отышлырак дип саный. Болай эшләү диндә тыелмаган. Әмма өйдә үткәрелсә, Коръән уку тәэсире нигезгә сеңә. Әбү Һөрәйра (р.г.): “Йортта Коръән укылса, бу өй үзенең әһелләре өчен иркен була, анда фәрештәләр иңә, ә шайтаннар мондый урыннан кача һәм бу йортта хәерлелек арта. Дөреслектә, әгәр өйдә Коръән укылмаса, бу йорт үз әһелләре өчен тарая. Фәрештәләр иңми, шайтаннар килә, мондый йортның яхшылыгы аз була”, — дигән. Кунаклар җыелган өйдән бәла-каза китәр, дигән хәдис тә бар. Кыскасы, Коръән йортта укылса хәерлерәк. Кешенең мөмкинлеге юк икән, кафеда да уздыра ала. Аллаһ кабул итсен.

Чыганак: https://vk.com/irekmaydani