Хәтер (район бәйгесе кысаларында)

(Дәү бабам Гыйләҗетдиннең кызы Шәкүрә әби сөйләгәннәргә нигезләнеп язылды)

Хәтер... Никадәр якты истәлекләр, авыр кичерешләр, кеше гомеренең гүзәл  мизгелләре һәм җан өшеткеч хәсрәтле минутлар саклана синдә!

Хәтер яраларым сыкрый, кызым,

Еллар агып, гомер узса да.

Онытылмый әткәй киткән көзләр,

80 тапкыр язлар килсә дә...

              ...

Көттем сине, әткәй, һәр иртәдә,

Пар наратлы юлдан эзләдем.

Дус кызларның әткәе бит кайтты,

Ә син һаман кайтып җитмәдең.

Көттем сине, әтием, һәр иртәдә,

Пар наратлы юлны күзләдем

Тәти күлмәк киеп, елый-елый,

Олы юлда сине эзләдем.

Пар наратлы басу капкасыннан

Чыккан чакта ниләр уйладың?

Кыңгыраулы яшел тальяныңда

Көт, кайтырмын, диеп җырладың.

Әнкәй бүләк иткән кулъяулыгың

Пар наратка элеп калдырдың.

“Озата барма” көен уйнаганда

 Үзәгемне өздең, яндырдың.

              ...

Ерак бабам, кайда синең кабрең?

Кайда калды синең эзләрең?

Көткән балаларың сине һәр яз саен,

Олы юлда булган күзләре...

Безнең әби-бабаларыбызның хәтере әнә шундый авыр һәм дәһшәтле сугыш истәлекләрен саклый. Ләкин безнең һәм киләчәк буын хәтерендә канлы күләгәләр урын алмасын, сыңар канатлы сабыйлар булмасын иде. Имин еллардагы изге эшләр генә теркәлеп уелып калсын безнең хәтер битләрендә. Сугыштан кайтмаганнар һәйкәл булып мәрмәр пьедесталларга басты. Яңа буын кешеләре үсеп чыкты.

Сугыш тирән яра калдырды, йөрәкләргә әрнү салды. Күңелләр һаман сызлана, сыкрый әле. Мин үзем дә, әти-әнием дә сугыш чорын күрмәдек. Бу дәһшәтле сугыш турында ишетеп кенә беләбез. Безнең авылдан да бик күп ир-атлар сугышта катнашкан. Алар арасында минем бабаларым – Гыйлаҗетдин белән Гыйззәтулла да булган.

Илебез җирендә сугыш эзләре югалды, әмма кешеләр күңелендә ул мәңге югалмас. Никадәр яшь гомерләр биреп, кайнар каннар түгеп яуланган Җинү көне иң зур бәйрәм булып буыннан буынга барыр…

Тәнзилә Гыйлаҗова, 6 нчы сыйныф укучысы