Теләче авылында бирнә җыйдылар

admin, 30 май 2025 - 19:44

272

Районда авыл урамнары буйлап, Сабан туе бәйрәменә бүләк җыюлар башланып китте.

Бирнә җыю – татар халкында сакланып килгән бик борынгы йолаларның берсе.

Бүген менә Теләче авылы гөрләп торды – оешма-предприятиедә эшләүчеләр, гөр килеп, бүләкләр җыйды. Шул исәптән, «Киләчәк» яшьләр үзәге, «Теләче» спорт мәктәбе һәм Теләченең беренче номерлы балалар бакчасында эшләүчеләр дә.

Ә өй хуҗалары , үз чиратларында, өйләреннән чыгып, теләкләр теләп, сабантуйга дип хәстәрләнеп куйган бүләкләрен тапшырды. Шунысы кызык, әгәр үзләре өйдә булмасалар, капка-коймаларына элеп калдыручылар булды.

Урамнарда караңгы төшкәнчегә кадәр гармун тавышы тынмады, дисәк тә ялган булмас.

Раиль – Гөлназ Мараковлар гаиләсе бирнә җыючыларны бүләк белән генә түгел, чәй өстәле белән каршы алып, тәмле коймак, кайнар чәй белән сыйлап озатты. Эссе көнне файда булсын дип, барыбызга да туңдырма да өләштеләр алар.