Без коррупция турында беләбезме?

Теләчедән Рәйханә Мостафина:

- Иң беренче чиратта кешенең иманы нык булырга тиеш. Андыйлар ришвәтчелек йогынтысына бирешмиләр. Югыйсә, һәркем эшләгән өчен тиешле хезмәт хакын ала. Берәү дә берни сорамый. Рәхмәт йөзеннән нидер “биреп” кеше үзе үк аларны ришвәтчелек корбаны итә. Хастаханә юлын таптамаганнар сирәктер хәзер. Күптән түгел генә Казан хастаханәсендә булып кайтырга туры килде. Яхшы мөгамәлә, ачык, ягымлы караш... барысы да бар. Авыруны аякка бастыру өчен барын да эшлиләр. Чын күңелемнән рәхмәтемне әйттем, алар да изге теләкләре белән озатып калдылар. Менә бит бернинди ришвәтчелек тә юк.

 Теләче авылыннан Илнур Ибраһимов:

–Ришвәтчелекне укып аңласам да, күңелем, җаным белән кабул итә алмыйм. Үземнең дә андый хәлдә калганым, очрашканым юк.  Берничә ел элек ике кызым  9 сыйныфны тәмамлады. Икесе  дә  шәһәрдә уку йортларына документларын тапшырдылар. Беркем берни сорамады. Яхшы укыйсың икән, югары уку йортларына кергәндә “сул яктан” табылган таныш-белешләр кирәкми. Ришвәтчелеккә дә юл ябык.

Алан авылы мәдәният йорты директоры Гүзәлия Җамалиева:

- Коррупция, беренче чиратта, кешенең җансыз, җәмгыятьнең әхлаксыз булуын аңлата. Икенче чиратта, кешенең акылын, намусын, оятын юкка чыгара. Акчасы күп булганнар нәрсә эшләгәнен белми, үзенең рәхәт тормышын һәм шәхси мәнфәгатьләрен генә кайгыртып яши. Әлеге темага багышланган чараларны мәдәният йортында укучылар, студентлар еш оештырабыз.

Беренче балалар бакчасы мөдире Алисә Дәүләтшина:

   -Балалар бакчасында  әлеге темага карата өлкән төркем белән рәсем бәйгеләре үткәрәбез. Сабыйлар бик теләп катнашалар. Моннан тыш балаларга аңлаешлы телдә коррупция төшенчәсенең ни икәнен дәресләр үткәреп аңлатабыз.

Райондашларыбыздан алынган сораштырулардан әнә шулар мәгълүм булды. Ришвәтчелек дигән афәтне арабызга үткәрмисе иде. Берничә елдан коррупция дигән колакка ят сүз дә ерак үткәндә, сүзлекләрдә генә калыр әле. Шулай булсачы!

Зөлфия Ибраһимова.

Фото: интернеттан