«Безнең балалар бакчасы тарихы» район бәйгесе башланып китте

16 сентябрь 2026 - 10:28 Автор:

admin

Белгәнебезчә, 2026 ел Россия Федерациясе Мәгариф министрлыгы тарафыннан Мәгариф системасында мәктәпкәчә белем бирү елы дип игълан ителде. Бу инициатива мәктәпкәчә яшьтәге балаларны тәрбияләүнең сыйфатын күтәрүгә, балалар бакчалары инфраструктурасын яхшыртуга һәм педагогларга ярдәм итүгә юнәлтелгән.

Шушы уңайдан, районда «Безнең балалар бакчасы тарихы» район бәйгесе башланып китте.
Әлеге бәйгегә килгән видеоязмалар белән сезне дә таныштырып барырбыз, хөрмәтле язылучыларыбыз. Беренче катнашучыбыз - Алан балалар бакчасы.

Алан авылының ясле-бакчасы 1977 елның 1сентябрендә эшли башлый. Алан авылы урта мәктәбендә укытучы булып эшләүче, партия члены, коммунист - Фәния Хәсәнова мөдир итеп билгеләнә. Тәрбия үзәгенә 54 бала кабул ителә - 30ы бакча төркеменә, 24 бала-ясле төркеменә. 1986 елның 1сентябреннән 2015 елга кадәр, 29 ел дәвамында, ясле - бакча мөдире булып Әнисә Гәрәфетдин кызы Габделвәлиева эшли. Оешма 2009 елда Алан урта мәктәбенең интернат бинасына күчерелә.

Балалар өчен барлык уңайлыклары булган бу бинага 2018 елда капиталь ремонт ясалды. Бакчаны ачу тантанасында Татарстан Рәисе Рөстәм Нургали улы Миннеханов та катнашты.
Бүгенге көндә балалар бакчасында 10 бала тәрбияләнә. Хәзерге вакытта бакча мөдире Сабирзанова Лилия Рәшит кызы. Тәрбияче - Алсу Тимершаех кызы Сибгатуллина.