Казанда Хәтер көненә багышланган чаралар узачак

21 июньдә Җиңү паркында «Сугышның Утлы картиналары» халыкара акциясе узачак. Шәһәр халкы һәм яшьләр иҗтимагый оешмалары активистлары кабызган 40 меңнән артык шәмнән Совет офицеры, Брест крепосте оборонасы җитәкчеләренең берсе Петр Михайлович Гаврилов портреты ясалачак. Татарстан өчен бу акция аеруча әһәмиятле, чөнки Петр Гаврилов Казан губернасында туган. Аның батырлыгы һәм чыдамлыгы дошман ударын үз өстенә алган Брест крепостен саклаучыларның сыгылмас ихтыяры символы. 

Шул ук көнне Казан югары уку йортлары студентлары режиссер Руслан Фәхрединовның патриотик музыкаль-театральләштерелгән «Җәлил» спектаклен күрсәтәчәк. Спектакль Советлар Союзы Герое, шагыйрь Муса Җәлил тормышына һәм батырлыгына багышлана, ул хәтта фашист төрмәләрендә дә рухын югалтмый һәм дошманга каршы көрәшне дәвам итә.

22 июньдә истәлекле чаралар 2.00 сәгатьтә «Хәтер шәме» акциясе белән башланачак. Яшьләр иҗтимагый оешмалары вәкилләре һәм шәһәр халкы Горький исемендәге паркта Билгесез солдат һәйкәленнән Җиңү паркына кадәр тантаналы йөреш белән узачак. Катнашучылар акция тәмамлангач, Ватанны саклаучыларның каһарманлыгын искә алу йөзеннән мәңгелек ут янына куелачак шәмле лампадалар алып барачаклар.

10.00 сәгатьтә Җиңү паркындагы «Мәңгелек ут» мемориалы янында хакимият органнары, ветераннар оешмалары вәкилләре һәм шәһәр халкы катнашында чәчәк салу тантанасы була.

Чыганак:татаринформ