14 февраль - гашыйклар көне

Бүген генә түгел, гомумән, елның һәр көне сезгә яраткан кешегезнең җылысын тоярга мөмкинлек бирсен, сез дә аны үзегезнең мәхәббәтегез, җылы карашыгыз, ихтирамыгыз белән бәхетле итегез.

Мәхәббәт - дөньяда булган иң изге хисләрнең берсе. Һәр йөрәк аны үзенчә аңлый, үзенчә кабул итә, бу, билгеле, кешенең рухи дөньясыннан тора. Гасырлар буе бөек философлар, галимнәр, язучы-шагыйрьләр әлеге сорауга җавап эзләп баш ватканнар, әмма әлегә хәтле берәү дә мәхәббәтнең төгәл формуласын яки кагыйдәсен уйлап тапмаган. Татар язучысы Әмирхан Еники әйтүенчә: "Мәхәббәт – ул йөрәк эше. Бернинди исәп-хисап мәҗбүр итү, көчләү, ялыну-ялвару белән тудырып булмый аны. Туса ул, чәчәк бөресе ачылгандай, бары үзеннән-үзе һәм үз вакыты белән генә туа”. Шуңа күрә, әгәр мәхәббәтнең асылына төшенергә теләсәң, акыллы һәм тәҗрибәле кешеләрнең язмаларын укырга кирәк. Аларның фикерләре белән танышкач, кайберсе белән килешәсең, я бәхәскә керәсең, я мәхәббәтнең уйдырма булуына инанасың.

Ә мәхәббәт турында канатлы сүзләр бик күп, мәсәлән, Нури Арслан:

"Мәхәббәткә рөхсәт сорамыйлар.
Мәхәббәткә рәхмәт әйтмиләр.
Ул бүләк тә һәм бурыч та түгел,
мәхәббәтне гаеп итмиләр", – дип ышандыра.

Без исә,  Әмирхан ага Еники фикерләренә кушылып: мәхәббәтегез йөрәк һәм акылдан чыгып гомерлеккә булсын!- дибез. Бәхет сезгә!

Фото: https://www.freepik.com